ᕈᐃᐅᓪ ᐊᖅᑯᑎᑦ ᓯᓚᑦᑐᖅᓴᕐᕕᒡᔪᐊᖅ ᐊᑦᑎᖅᑕᐅᓯᒪᕗᖅISM ᑐᓂᔭᐅᓂᐊᖅᑐᖅ ᓯᓚᑦᑐᖅᓴᕐᕕᔾᔪᐊᑉ ᐊᐃᑉᐸᖓᓂᑦ ᐊᕐᕌᒍᑕᒫᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᖅ ᐃᖅᑲᓇᐃᔭᕐᕕᒻᒥᑦ ᐊᕐᕌᒍᒧᑦ ᑐᓂᕐᕈᓯᐊᖅ.

ᑖᓐᓇ ᑐᓐᓂᖅᑯᓯᐊᖅ ᓴᖅᑭᑎᑕᐅᓚᐅᖅᐳᖅ ᐃᓕᓴᖅᓯᔪᒪᓂᕐᒧᑦ ᐃᖅᑲᓇᐃᔭᖅᑎᑦᑎᐊᕙᐅᕙᖕᓂᖏᓐᓄᑦ ᐃᖅᑲᓇᐃᔭᕐᕕᒋᔭᐅᔪᑦ ᐱᒻᒪᕆᐊᓗᖕᒥᒃ ᐃᓕᑦᑎᕙᓪᓕᐊᓂᕐᒧᑦ ᐊᑐᖃᑦᑕᖅᓯᒪᔭᒥᓄᑦ. ᑐᓂᔭᐅᓚᐅᖅᑐᖅ ᓯᓚᑦᑐᖅᓴᕐᕕᔾᔪᐊᑉ 6-ᒋᔭᖓᓂᑦ ᐊᕐᕌᒍᑕᒫᑦ ᐃᖅᑲᓇᐃᔮᓂᒃ ᐱᕚᓪᓕᖅᑎᑦᑎᓂᕐᒧᑦ ᑲᑎᒪᓂᖓᓂᑦ ᕕᐅᓪᓗᐊᓕ 7.

ᐊᕐᕌᒍᑦ 40 ᐅᖓᑖᓂ ᓴᓇᕝᕕᖕᒦᖃᑦᑕᖅᓯᒪᓗᓂ, ISM ᖃᕆᓴᐅᔭᓕᕆᔨᒃᑯᑦ (IT) ᐅᐸᓗᖓᐃᔭᐅᑎᓄᑦ ᑲᒻᐸᓂᒃᑯᑦ ᐊᑐᐃᓐᓇᐅᑎᑦᑎᓲᑦ ᖃᕆᑕᐅᔭᓕᕆᔾᔪᑎᓄᑦ ᐅᖃᐅᔾᔪᐃᕙᒃᖢᑎᒃ ᐊᒻᒪ ᐋᖅᑭᒋᐊᕈᑎᒃᓴᓂᒃ ᐱᔨᑦᑎᕋᖅᑕᐅᔪᓄᑦ ᑲᓇᑕᓕᒫᒥ.

ᐱᔭᕇᖅᓯᔾᔪᓯᐊᖅᔪᐊᖅ ᓄᓇᕐᔪᐊᕐᒥ ᐊᐅᓚᑦᑎᓂᕐᒧᑦ ᐃᓕᓐᓂᐊᖅᑎ ᕆᑰᑐ ᕋᐃᒥᕆᐊᔅ ᐱᔭᕇᖅᓯᓪᓗᓂ ᐊᕐᕌᒍᓄᑦ ᑕᓪᓕᒪᓄᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᕐᒥᒃ ᐅᕙᓂ ISM 2018−ᒥ.

"ISM ᐱᑎᑦᑎᓪᓗᓂ ᐱᐅᑦᑎᐊᖅᑐᒥᒃ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᒥᒃ ᐊᑐᕐᓂᑯᒥᒃ ᐱᑎᑦᑎᑐᐃᓐᓇᙱᑦᑐᒥᒃ ᓈᒻᒪᒃᑐᓂᒃ ᐃᓕᓐᓂᐊᕐᓂᕐᒥᒃ ᐱᓕᕆᔨᒻᒪᕆᐅᓂᕐᒧᓪᓗ ᐃᓕᑦᑎᓂᕐᒥᒃ ᕆᑰᑐᒧᑦ ᑭᓯᐊᓂ ᐊᒃᑐᐃᓪᓗᓂ ᐃᖅᑲᓇᐃᔭᖅᑐᓕᕆᓂᕐᒥ ᐃᖅᑲᓇᐃᔮᖓᓂᒃ ᑲᓇᑕᒥ," ᐅᖃᖅᑐᖅ ᓇᑖᓴ ᑕᐃᓚᐃ, ᐊᐅᓚᑦᑎᔨ ᐃᖅᑲᓇᐃᔮᓄᑦ ᐃᓕᓐᓂᐊᕐᓂᖅ ᐱᕙᓪᓕᐊᑎᑦᑎᓂᕐᓗ ᕈᐃᐅᓪ ᐊᖅᑯᑎᖏᓐᓄᑦ. "ᓱᓕ ᐱᓕᕆᔪᖅ ISM ᐆᒃᑑᑎᑦᑎᐊᕙᖕᒥᑦ ᖃᓄᖅ ᐃᖅᑲᓇᐃᔭᕐᓂᕐᒧᑦ−ᐃᓚᓕᐅᔾᔭᐅᓯᒪᔪᑦ ᐃᓕᑦᑎᕙᓪᓕᐊᓂᖅ ᐃᑲᔫᑎᖃᕈᓐᓇᕐᒪᖔᑦ ᐃᓕᓐᓂᐊᖅᑎᓄᑦ ᐃᖅᑲᓇᐃᔭᖅᑎᑦᑎᔨᓄᓪᓗ."

ᒪᕆ ᑑᕼᐅᑎ, ᐊᐅᓚᑦᑎᔨ ᐃᓄᖕᓄᑦ ᐃᓕᖅᑯᓯᕐᓄᓪᓗ ISM, ᐅᖃᖅᐳᖅ ᕿᓂᕐᓂᕋᖅᖢᓂ ᒪᐅᖓᑦᑎᐊᖅ ᐃᖅᑲᓇᐃᔭᖅᑎᒃᓴᒥᒃ ᐃᒪᓐᓇᐅᙱᖔᖅᑐᖅ, ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᒥᒃ ᐊᐱᖅᓱᖅᑎᓪᓗᒍ ᕋᐃᒥᕆᐊᔅ−ᒥᒃ. ᑭᓯᐊᓂ, ᐅᖃᖅᐳᖅ ᐱᒋᐊᖅᑎᓯᒪᔭᖓ ᐊᒻᒪ "ᐅᒃᐱᕈᓱᙱᖦᖢᓂ" ᐅᒃᐱᕈᓱᓕᕐᓂᕋᖅᖢᓂ ᐃᖅᑲᓇᐃᔮᖅᑖᖅᑎᖦᖢᓂᐅᒃ.

 "ᐃᓱᒪᒋᔭᕋ ᐃᖅᑲᓇᐃᔭᖅᑎᑦᑎᔨᑦ ᕿᒥᕐᕈᔭᕆᐊᖃᕋᓱᒋᓪᓗᒋᑦ ᑭᖑᓂᑦᑎᓐᓂ ᐱᖅᑯᓯᒃᑯᑦ ᐆᒃᑐᕋᐅᑎᓂᒃ ᓲᕐᓗ ᐊᕐᕌᒍᒐᓴᖕᓄᑦ ᐊᑐᕐᓂᑯᖏᓐᓂ ᑕᐅᑐᒃᓗᒋᓪᓗ ᖃᓄᖅ ᐃᖅᑲᓇᐃᔭᖅᑎ ᓇᒃᓴᕈᓐᓇᕐᒪᖔᑦ ᑭᓱᓂᒡᓗ ᐃᖅᑲᓇᐃᔭᖅᑎᑦᑎᔨ ᐃᓕᓴᐃᔪᓐᓇᕐᒪᖔᑦ," ᑑᕼᐅᑎ ᐅᖃᖅᑐᖅ. "ᐃᓕᓐᓂᐊᖅᑎᑦᑎᔪᓐᓇᙱᑦᑐᖓ ᐃᓕᖅᑯᓯᑦᑎᐊᕆᖕᓂᕐᒥᒃ ᐱᔪᒃᓯᑎᑦᑎᓂᕐᒧᓪᓘᓐᓃᑦ ᐱᒋᐊᖅᑎᑦᑎᓂᕐᒧᓪᓘᓐᓃᑦ. ᑕᐃᒪᓐᓇ ᓇᓂᓯᓚᐅᖅᑐᖓ ᕆᑰᑐᒥᑦ, ᑕᐃᒪᓐᓇᓗ ᐃᖅᑲᓇᐃᔭᖅᑎᑦᑎᔨᑦ ᕿᓂᕆᐊᖃᖅᑰᖅᑐᑦ."

ᕋᐃᒥᐅᔅ ᐅᖃᖅᐳᖅ ᖁᔭᓕᓂᕋᖅᖢᓂ ISM ᐃᑲᔪᖅᑐᐃᓂᖓᓄᑦ ᐃᓚᐅᕙᖕᓂᖏᓐᓄᓪᓗ ᐃᖅᑲᓇᐃᔭᕐᕕᒋᔭᒥᓂ ᐃᓕᑉᐸᓪᓕᐊᓂᕆᕙᒃᑕᒥᓄᓪᓗ. ᐅᖃᖅᑐᖅ, ᑕᐅᑐᑦᑕᐅᓂᖅᓴᐅᓗᓂ ᖃᓄᖅ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᖅ ᑐᕌᖅᑎᑦᓯᒍᓐᓇᕐᒪᖔᖅ ᐱᕕᑦᓴᖃᕐᓂᐅᔪᓂᑦ ᐃᓕᓐᓂᐊᖅᑎᓄᑦ ᐃᖅᑲᓇᐃᔭᕐᕕᓐᓄᓪᓗ.

"ᖃᔅᓯᑲᓪᓚᐃᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᑦ ᐱᒋᐊᓕᓵᖅᑐᓄᑦ ᐃᓂᓅᖓᕗᑦ ᑲᒻᐸᓂᒋᔭᐅᔪᓪᓗ ᐃᖅᑲᓇᐃᔭᖅᑎᑦᑎᔪᒪᙱᑐᐃᓐᓇᕆᐊᖃᖅᐳᑦ ᐊᓂᒍᐃᓯᒪᔪᒥᒃ ᐃᓕᓐᓂᐊᖅᑎᒥᒃ ᑭᖑᓂᑦᑎᓐᓂ ᐱᓕᕆᖃᑦᑕᖅᓯᒪᓂᑰᓗᓂ ᑕᒪᒃᑯᓄᖓ ᐱᓕᕆᐊᒃᓴᓄᑦ," ᕋᐃᒥᕆᐊᔅ ᐅᖃᖅᖢᓂ. "ᐱᓪᓗᐊᑕᐅᔪᖅ ᐱᓇᔪᖕᓂᐊᕐᓗᓂ ᐊᓯᖏᓐᓄᑦ ᐃᖅᑲᓇᐃᔮᒃᓴᓄᑦ ᐱᔪᒪᔭᑦᑎᓐᓄᑦ ᐅᕙᑦᑎᓐᓂᒡᓗ ᖁᓱᙱᓪᓗᑕ. ᖁᑦᑎᓂᖅᐹᒥ ᐃᓕᓐᓂᐊᖅᑎᐅᓪᓗᑕ, ᖃᐅᔾᔨᑎᖃᖅᐳᒍᑦ ᑲᒻᐸᓂᓅᖅᑎᑦᑎᔪᓐᓇᖅᑐᑕ. ᐱᕕᖃᕆᐊᖃᖅᐳᒍᑦ ᑕᐃᒪᐃᓕᐅᕈᓐᓇᕐᓗᑕ."